साउन महिनाको आधाआधीमा धादिङमा ९५ प्रतिशत रोपाई सकिएको छ । मकै पाक्न बाँकी धुनिवेशी लगायतका केही ठाउँहरुमा भने धान रोपाई हुन बाँकी रहेको कृषि ज्ञान केन्द्र धादिङका प्रमुख झलकनाथ कंडेलले जानकारी दिनुभयो ।
विगतका वर्षहरुको तुलनामा यो वर्ष धान खेती छिटो भएको पनि कंडेलले बताउनुभयो । समयमै मनसुन सुरु भएका कारण पनि धान खेती छिटो भएको बताउँदै उहाँले यो महिनाको अन्तिम सम्ममा धादिङमा धान रोपाई सकिने बताउनुभयो ।
धादिङको निलकण्ठ, धुनिवेशीं नगरपालिका, त्रिपुरासुन्दरी, नेत्रावती, वेनिघाट रोराङ, गजुरी, थांक्रे, गल्छी लगायतका क्षेत्रहरुमा बर्खे धानको खेती हुँदै आएको छ । धादिङमा १३ हजार ६ सय हेक्टर क्षेत्रफलमा ३४ हजार मेट्रिकटन बर्खे धान उत्पादन हुँदै आएको कृषि ज्ञान केन्द्र धादिङको तथ्याङ्क रहेको कंडेलले बताउनुभयो ।
धादिङमा उन्नत जातका सावित्री, मकवानपुरे १, सुख्खा १, २, ३ , खुमल ४, ७, ६ लगायतका धान रोपिंदै आएको छ ।
