उत्तरी धादिङको रुविभ्याली गाउँपालिकाको सदरमुकाम स्थित सम्पर्क कार्यालयमा पालिका अध्यक्षले लगाएको ताला अब असार र साउन २ महिना मात्रै खुल्ने भएको छ ।
दुई तिर कार्यालय हुँदा सेवाग्राही अलमलमा परेको कारणले असार साउन महिनामा खोल्ने र हिउँदको समयमा भने माथी गाउँपालिकाबाटै कार्य सम्पादन गरिने उहाँले बताउनुभयो ।
यहि कात्तिक २२ सूचना टाँस गरेर सम्पर्क कार्यालय सँधैको लागि बन्द गरिएको थियो । ‘कार्यालय खोल्नुपर्ने समयमा पनि कार्यालय बन्द गरेको अवस्थामा भेटिएकोले सधैको लागि बन्द गरिएको गाउँपालिका अध्यक्ष चेरुङ तामाङद्रा हस्ताक्षरित सूचनामा भनिएको थियो । तर पालिकामा बैंङ्क तथा वित्तिय संस्था नभएको र भौगोलिक विकटतालाई मध्येनजर गर्दै धादिङवेशींमा रहेको सम्पर्क कार्यालयमा लेखा शाखाको कर्मचारी मात्रै रहने गरि असार र साउन गरि २ महिना मात्रै सम्पर्क कार्यालय खुल्ने गाउँपालिका अध्यक्ष तामाङले बताउनुभएको छ ।
तिहारपछि २२ गते सोमबारदेखि नै कार्यालय खोल्नुपर्ने भएपनि कार्यालय खोल्न कोही कर्मचारी नआएपछि अध्यक्षले नै सूचना टाँस गरेर कार्यालय बन्द गराएको हो । ताला तोडफोड गरि कार्यालय संचालन गरेको पाइएमा विभागिय कार्वाहि गरिने समेत सुचनामा उल्लेख छ । प्रमुख प्रशासकिय अधिकृत लगाएत विषयगत शाखा प्रमुखहरुलाई गाउँपालिकाको कार्यालय सेर्तुङमा २४ घण्टाभित्र लिखित जवाफसहित हाजिर हुन अध्यक्ष तामाङले सूचनामार्फत नै जानकारी गाराउनुभएको छ ।
गाउँपालिकाले स्थानीय तह लागु भएदेखि नै भौगोलिक विकटताको कारण सेवाग्राहीलाई सेवा प्रवाहमा सहज गराउन जिल्ला सदरमुकाममा नै सम्पर्क कार्यालय संचालन गरी सेवा प्रवाह गर्दै आएको थियो । कार्यालयमा कर्मचारी नरहेको र सेवाग्राहीलाई सेवा प्रवाहमा ढिला सुस्ती भएको जनगुनासो बढ्न थाले पश्चात विगत ६ महिनादेखि नियमित छड्के चेक गर्दा पटक पटक कार्यालय बन्द रहेको भेटिएको गाउँपालिका अध्यक्ष तामाङले बताउनुभएको छ ।
दशैं तिहार जस्ता चाडपर्वहरुमा विदा बस्दा पनि सरकारले तोकेको भन्दा अगाडि नै विदा बस्ने र सरकारले नै तोकेको समयमा कार्यालय नखुलाएकोले पनि बाध्य भएर सूचना टाँस गर्नुपरेको अध्यक्ष तामाङको भनाई छ । गाउँमा रहेको कार्यालय त बन्द छ नै सदरमुकाममा रहेको सम्पर्क कार्यालय समेत बन्द हुँदा सेवाग्राही मर्कामा परेका छन् ।
तिहार लगत्तै २२ गते सोमबार र २३ गते मंगलबार सेवा लिन आएका सेवाग्राही कार्यालयमा कोही नभेटिएपछि फर्किएका थिए । साउन २३ गते गाउँसभा सकेर सेर्तुङस्थित कार्यालयबाट सम्पर्क कार्यालय सदरमुकाम झरेका कर्मचारी आजसम्म कोही पनि गाउँ नफर्किएको स्थानीय सेवाग्राहीले गुनासो गरेका छन् । कर्मचारीहरु अधिकांश समय सदरमुकाममा नै बस्ने र सामाजिक सुरक्षा भत्ता बाँड्न मात्रै गाउँ पुग्ने गरेको सेवाग्राहीहरु बताउँछन् ।
