भारतमा मोदी फेरी प्रधानमन्त्री बन्दै,नेपालमा बहस सुरु

जेठ ११ ।
लोकसभा चुनावमा भारतीय जनता पार्टी (भाजपा) को जितसँगै नरेन्द्र मोदी दोस्रो कार्यकालका लागि प्रधानमन्त्री बन्ने निश्चित भएको छ । मोदीको दोस्रो कार्यकालमा छिमेकीसँगको सम्बन्ध र आगामी दिनको परराष्ट्र नीतिका बारेमा नेपालमा पनि बिभिन्न कोणबाट छलफल भइरहेको छ ।

भाजपा हिन्दु राष्ट्रवादी पार्टी भएकाले त्यसको प्रभाव अन्य छिमेकी राष्ट्रमा पर्ने आँकलन भइरहेको छ भने भारतले अर्थ नीति कस्तो लिन्छ भन्नेहरू पनि छन् । भारत नेपालको सबभन्दा नजिकको छिमेकी देश भएका हुनाले उसले लिने नीतिले नेपाललाई प्रभाव पार्न सक्ने विश्लेषकहरू बताउँछन् । परराष्ट्रविद् प्राध्यापक डा लोकराज बरालले प्रधानमन्त्री नरेन्द्र मोदीको पुनरागमनले नेपालको राजनीतिमा कुनै प्रभाव नपार्ने बताउनुहुन्छ । प्रधानमन्त्री केपी शर्मा ओलीका परराष्ट्र मामिला सल्लाहकार डा. राजन भट्टराईले मोदी दोस्रो कार्यकालका लागि निर्वाचित हुनु नेपालको हितमा हुने विश्वास व्यक्त गर्नुभयो ।

प्रधानमन्त्री ओलीले नेपालको तर्फबाट बधाई तथा अर्को कार्यकालको सफलताको शुभकामना व्यक्त गरेको बताउँदै उहाँले दुई देशबीचको सम्बन्धलाई नयाँ शिराबाट उचाइमा लग्ने बारे दुवै प्रधानमन्त्रीबीच कुराकानी भएको सीआईएनलाई जानकारी दिनुभयो । पछिल्लो समय नेपाल–भारतबीचको सम्बन्धमा धेरै सुधार भएको उल्ल्ेख गर्दै भट्टराईले आगामी दिनमा दुई देशबीचको कूटनीतिक सम्बन्धमा थप सुधार हुँदैजाने विश्वास व्यक्त गर्नुभयो ।