तस्विर : धादिङपोष्ट
कात्तिक ११ गतेदेखि धादिङमा हुने जिल्लास्तरीय खुल्ला टी–२० क्रिकेट प्रतियोगिताको लागि १४ वटा टिमले नाम दर्ता गराएका छन् ।
धादिङ जिल्ला क्रिकेट संघले मंगलबार पत्रकार सम्मेलन गरि १४ वटा टिमले नाम दर्ता गराएको जानकारी गराएको हो । यस्तै १४ वटा टिमको सहभागितामा हुने क्रिकेटको लागि संघले मंगलबारै खेल तालिकासमेत सार्वजनिक गरेको छ ।
धादिङ जिल्ला क्रिकेट संघले आयोजना गरेको प्रतियोगिता बेनिघाट रोराङ गाउपालिका वडा नम्बर ५ विशालटास्थित चन्द्रोदय माध्यमिक विद्यालयको खेल मैदानमा हुदैछ । संघले मंगलबार सार्वजनिक गरेको खेल तालिकाअनुसार कात्तिक ११ गते प्रतियोगिताको उद्घाटनमा २ सेट खेल खेलाइने भएको छ । प्रतियोगिताको उद्घाटन खेल बिहान १० बजेबाट शुरु हुने बताइएको छ । उद्घाटनमा हाम्रो जनहित युवा समाज र कारु मेमोरियल ट्रस्ट प्रतिस्पर्धा गर्नेछन् ।
सोहि दिन हुने दोस्रो खेलमा धादिङ समाज धादिङ र गजुरी सामुदायिक विकास समाज प्रतिस्पर्धा गर्नेछन् । प्रतियोगिताको विजेतालाई नगद ७० हजार र उपविजेतालाई नगद ४० हजारसहित पुरस्कृत गरिने बताइएको छ ।
