धादिङमा आजदेखि प्रदेश स्तरिय ट्राफिक सप्ताह सुरु भएको छ । दुर्घटना न्युनिकरण गर्ने उद्देश्यले सुरु भएको ट्राफिक सप्ताहको आज नीलकण्ठ नगरपालिकाका नगर प्रमुख भिम प्रसाद ढुङ्गानाले उद्घाटन गर्नुभएको हो ।
उद्घाटन गर्नुहुँदै प्रमुख ढुङ्गानाले दुर्घटना न्यूनिकरण गर्न मानिस आँफै सचेत हुनुपर्ने बताउनुभयो । जब सम्म मानिसमा सचेतना आउँदैन तब सम्म दुर्घटना न्यूनिकरण नहुने उहाँको भनाई थियो । विद्यालयका पाठ्यक्रमा पनि ट्राफिक नियमबारे पठकपाठन गरिनुपर्ने बताउनुभयो ।
सवारी दुर्घटनाका कारण, न्यूनीकरणका उपाय लगायतका बिषयवस्तुलाई समेटी स्थानीय तहले एउटा विद्यालय पाठ्यक्रम नै बनाएर सचेतना फैलाउनुपर्ने बताउनुभयो । दिनानु दिन अकालमै संयौ मानिसको सडक दुर्घटनामा मृत्यु हुने भएकोले सचेतनाका कार्यक्रमहरु गर्दै जानुपर्ने बताउनुभयो ।
ट्राफिक सप्ताहमा विद्यालय, टोल टोलमा पुगेर ट्राफिक प्रहरीले सचेतना मुलक कार्यक्रम गरिने जिल्ला प्रहरी कार्यालय धादिङका प्रहरी प्रमुख उपरिक्षक गौतम मिश्रले जानकारी दिनुभयो । धेरै दुर्घटना हुने धादिङ जिल्ला पनि एक भएकोले पृथ्वीराजमार्ग अन्तरगत पर्ने धादिङको ८७ किलो मिटर राजमार्ग भित्र यात्रु, सवारी चालक, सहचालकहरुलाई ट्राफिक शिक्षा प्रदान गर्ने लगायतका कार्यक्रमहरुको रहेको उहाँले बताउनुभयो ।
आन्तरिक मामिला तथा कानून मन्त्रालय बागमती प्रदेश सरकारको सहयोगमा बागमती प्रदेश प्रहरी कार्यालय हेटौडाको सहकार्य तथा समन्वय र नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय रामनगर चितवन, जिल्ला प्रहरी कार्यालय धादिङ र जिल्ला ट्राफिक प्रहरी कार्यालय गजुरी धादिङको संयुक्त आयोजनामा ट्राफिक सप्ताह सुरु भएको हो ।
सप्ताहको पहिलो दिन आज पुछारबजारदेखि सिरानबजारको दही चौतारासम्म प्रभातफेरी कार्यक्रम गरिएको छ । प्रभात फेरीमा विभिन्न सरकारी तथा गैरसरकारी संघसंस्था, विद्यालयका शिक्षक, विद्यार्थी जातिय संघ संस्थाका प्रमुख तथा प्रतिनिधिहरुको सहभागीता रहेको थियो ।
