बैशाख ११,धादिङ
नेत्रावति डपजोङ विपत्ती पश्चात पुर्नव्यवस्थापन परियोजनाको शुभारम्भ गरिएको छ । नेत्रावति डपजोङ गाउँपालिकामा विशेष गरि शिक्षा, स्वास्थ्य, सरसफाई, खानेपानी, कृषि सशक्तिकरण र क्षमता विकासको क्षेत्रमा काम गर्ने उद्देश्यका साथ यो परियोजनाको शुभारम्भ गरिएको हो । (Presbyterian Disaster Assistance) (PDA) – USA को आर्थिक सहयोग तथा ( Together For Nepal ) नामक संस्थाको आयोजनामा यो कार्यक्रम सञ्चालन हुने भएको छ । यो कार्यक्रम नेत्रावती डपजोङ गाउँपालिकाको ५ वटै वडाहरुमा सञ्चालन गरिने छ । 
विशेष गरि (Together For Nepal ) ले २०७२ सालको विनाशकारी भुकम्प पश्चात नेत्रावति डपजोङ गाउँपालिका भित्र राहात सहयोग र पुर्नस्थापनाको साथै शिक्षा, स्वास्थ्य, सरसफाई, खानेपानी, कृषि सशक्तिकरण र क्षमता विकासको क्षेत्रबाट काम सुरु गरेको थियो । परियोजनाको प्रभाकारीता र स्थानीयको माग अनुसार यो परियोजना थप गरिएको र परियोजनालाइ सफल र प्रभावकारी बनाउनको लागि सम्पूर्ण नेत्रावती डपजोङ बासिको साथ सहयोगको आवश्यकता रहेको (Together For Nepal) का अध्यक्ष सुभासन भट्टराईले बताउनुभयो । यो कार्यक्रम करिब १० महिनासम्म लागु हुने बताएको छ ।
परियोजना शुभारम्भ कार्यक्रममा नेत्रावति डपजोङ विपत्ती पश्चात पुर्नव्यवस्थापन परियोजनाका कार्यक्रम संयोजक हरिशरण जमकट्टेलको अध्यक्षता रहेको कार्यक्रममा धादिङ क्षेत्र नं २ प्रदेश क का प्रदेश सांसद तथा नेकपा प्रदेश नं ३ का प्रदेश कमिटि सदस्य डा. रामकुमार अधिकारीको प्रमुख आतिथ्यता रहेको थियो । कार्यक्रममा नेत्रावति डपजोङ गाउँपालिकाका उपाध्यक्ष उर्मिला तामाङ, प्रशासकिय अधिकृत डिलमान शाक्या, स्थानीय जनप्रतिनीधिहरु, दातृ निकायका प्रमुख तथा प्रतिनीधिहरु र टुगेदर फर नेपालका अध्यक्ष सुभासन भट्टराईको विशेष आतिथ्यता रहेको थियो । भने स्थानीय विभिन्न सामाजिक संघ–संस्थाका प्रमुख तथा प्रतिनीधि, शिक्षक,वुद्धिजिवि,समाजसेवि लगायत स्थानियहरुको उपस्थिति रहेको थियो । कार्यक्रममा राष्ट्रिय कलाकारहरु रितु तामाङ र प्रदिप रोक्काले सांस्कृतिक प्रस्तुतिका साथ भरपुर मनोरञ्जन गराएका थिए ।
