धादिङ प्रहरीले अवैध रूपमा सालको काठ ओसारपसार गर्दै गरेको अवस्थामा ३ जनालाई पक्राउ गरेको छ।
जिल्ला प्रहरी कार्यालय धादिङका अनुसार बेनिघाट रोराङ गाउँपालिका–७ स्थित चरौंदीबाट स्यादुलतर्फ जाँदै गरेको लु ३ त ८०७८ नम्बरको ट्र्याक्टरमा अवैध सालको काठ लोड गरी लैजाँदै गरेको सूचनाका आधारमा प्रहरी टोलीले चेकजाँच गरेको थियो।
इलाका प्रहरी कार्यालय गजुरी र इलाका प्रहरी कार्यालय बेनिघाट धादिङबाट खटिएको संयुक्त प्रहरी टोलीले ट्र्याक्टर जाँच गर्ने क्रममा अवैध रूपमा ओसारपसार गरिँदै गरेको ३३ वटा साल जातको काठ बरामद गरेको जनाएको छ। प्रहरीले बरामद काठ नापजाँच गर्दा करिब ७२.५१ क्युफिट रहेको बताएको छ।
घटनामा संलग्न रहेको आरोपमा ट्र्याक्टर चालक बेनिघाट रोराङ गाउँपालिका–५ बस्ने २३ वर्षीय सुमन परियार, सोही गाउँपालिका–७ बस्ने २८ वर्षीय भ्रदलाल प्रजा र ३६ वर्षीय शिवलाल प्रजालाई नियन्त्रणमा लिइएको प्रहरीले जनाएको छ।
बरामद काठ तथा पक्राउ परेका व्यक्तिहरूलाई आवश्यक अनुसन्धान तथा कानुनी कारबाहीका लागि डिभिजन वन कार्यालय धादिङबेसी पठाइएको जिल्ला प्रहरी कार्यालय धादिङले जनाएको छ।
