धादिङमा स्थानीय तहको कार्यालयबाटै मतदाता नामावली संकलन सुरु हुदैछ ।
मंसिरर १७ गतेदेखि मतदाता नामावली संकलन सुरु गरिने भएकोले अहिलेसम्म छुटेका र नयाँ दर्ता गराउन जिल्ला निर्वाचन कार्यालय धादिङले आग्रह गरेको छ । आ–आफ्नै स्थानीय तहको कार्यालयबाट मतदाता नामावली संकलन गर्ने भएकोले नेपाली नागरिकता प्राप्त गरेका नागरिकले समयमै दर्ता गराउन कार्यालयले आग्रह गरेको हो ।
योपटक मतदाता नामावली संकलन कार्यक्रम २ चरणमा गर्न लागेको जिल्ला निर्वाचन कार्यालय धादिङका जिल्ला निर्वाचन अधिकारी सन्तोष कुमार श्रेष्ठले बताउनुभयो । धादिङमा पहिलो चरणमा रुवीभ्याली, गंगाजमुना, सिद्धलेक, गजुरी, ज्वालामुखी गाउपालिका र धुनीबेशी नगरपालिकामा मंसिर १७ गतेदेखि २६ गतेसम्म १० दिन मतदाता नामावली संकलन गरिने निर्वाचन कार्यालय धादिङले जनाएको छ ।
यस्तै दोस्रो चरणमा त्रिपुरासुन्दरी, नेत्रावती डबजोङ, बेनिघाट रोराङ, थाक्रे, गल्छी, खनियाबास गाउपालिकामा मंसिर २८ गतेदेखि पुष ८ गतेसम्म संचालन हुने कार्यालयले जनाएको छ । यस्तै दर्ता गर्न छुट भएकाहरुले जिल्ला निर्वाचन कार्यालय र जिल्ला प्रशासन कार्यालय धादिङबाट समेत दर्ता गराउन सकिने निर्वाचन अधिकारी सन्तोष कुमार श्रेष्ठले बताउनुभयो । मतदाता नामावली दर्ताको लागि अनिर्वाय रुपमा सक्कल नेपाली नागरिकता आवश्यक पर्नेछ ।
