धादिङको बेनिघाटरोराङ गाउपालिकाको वडा नम्वर ९ मझिमटारमा महिलाहरुसँग लैङ्गिक हिंसाको अवस्था र चुनौती विषयमा छलफल गरिएको छ ।
लैङ्गिक हिंसा विरुद्धको १६ दिने अभियानअन्तर्गत विहिबार मझिमटारका स्थानीय महिलाहरुसँगै छलफल गरिएको हो । सहयात्री समाज नेपाल र महिला मानव अधिकार रक्षक जिल्ला सञ्जाल धादिङले आयोजना गरेको कार्यक्रममा जिल्लामा लैङ्गिक हिंसाको वर्तमान अवस्थाको बारेमा छलफल गरिएको थियो ।
बालविवाह, बहुविवाह, घरेलु हिंसा र यौनजन्य हिंसाको बारेमा अधिवक्ता राधिका सापकोटाले जानकारी गराउनुभएको थियो । यस्तै महिला मानवअधिकारकर्मी गायत्री खतिवडाले लैङ्गिक हिंसा विरुद्धको १६ दिने अभियानको बारेमा जानकारी दिदै गाउसमाजमा हुने हिंसाका घटनालाई लुकाउन नहुने र हिंसा पीडितको लागि सहयोगी व्यवस्थाहरु भएकोले न्यायको लागि आवाज उठाउन जरुरी रहेको बताउनुभएको थियो ।
कार्यक्रममा सहभागी महिलाहरुले हिंसा भएपनि उजुरी गर्ने वातावरण नभएको, गाउ समाज र राजनीतिक दलले हिंसालाई लुकाउन दबाब दिने गरेको बताएका थिए । कार्यक्रममा स्थानीय महिला मानवअधिकार रक्षकहरु, आमा समूहमा आवद्ध महिलाहरुको सहभागिता रहेको थियो ।
