आईसीसी एकदिवसीय वरीयतामा अस्ट्रेलिया पाँचौँ स्थानमा झरेको छ । अन्तर्राष्ट्रिय क्रिकेट परिषद् (आईसीसी) को पछिल्लो वरीयतामा अस्ट्रेलिया एक स्थान खस्किएर पाँचौँ स्थानमा झरेको छ ।
घरेलु टोली दक्षिण अफ्रिकासँग तीन खेलको एकदिवसीय शृङ्खला खेलिरहेको अस्ट्रेलियाले लगातार दुई खेलमा हार बेहोरेको छ ।
एकदिवसीय वरीयतामा पाकिस्तान एक स्थान सुधार गरेर चौथो स्थानमा उक्लिएको छ ।
यस्तै इङ्ग्ल्यान्ड एक स्थान सुधार गरेर छैटौँ स्थानमा उक्लिएको छ । यसैगरी श्रीलङ्का एक स्थान खस्किएर सातौँ स्थानमा झरेको छ । घरेलु टोली इङ्ग्ल्यान्डले तीन खेलको एकदिवसीय शृङ्खलामा श्रीलङ्कालाई २–१ ले हराएको थियो ।
एकदिवसीय वरीयतामा भारत शीर्ष, न्युजिल्यान्ड दोस्रो र दक्षिण अफ्रिका तेस्रो स्थानमा यथावत् छन् । एकदिवसीय वरीयतामा नेपाल १७औँ स्थानमा यथावत् छ ।
