२०८३ मंसिर ३, बुधबार | --:--:--
ब्रेकिङ खबर
Dhading update

एमालेको राष्ट्रिय कार्यकर्ता भेला आजदेखि

आउँदो पालिका चुनाव केन्द्रित रहेर छलफल हुने

एमालेको राष्ट्रिय कार्यकर्ता भेला आजदेखि

प्रतिपक्ष दल नेकपा एमालेको राष्ट्रिय कार्यकर्ता भेला आजदेखि काठमाण्डौमा शुरु हुँदैछ ।

एमालेले यो भेलालाई आउँदो पालिका चुनावको तयारीमा केन्द्रित गर्ने भएको छ । स्थायी समितिको हिजोको बैठकले भेलालाई पालिका चुनाव केन्द्रित बनाउने निर्णय गरेको हो ।
हिजोको बैठकमा भेला तयारी समितिका संयोजक भानुभक्त ढकालले व्यवस्थापकीय तयारी र दुईदिने कार्यक्रम तालिकाबारे बैठकलाई ब्रिफिङ गर्नुभएको थियो ।

उपमहासचिव लेखराज भट्टकाअनुसार राष्ट्रिय भेलामा अध्यक्ष केपी ओलीले वर्तमान राष्ट्रिय राजनीति, भावी कार्यदिशा र पार्टीले गर्नुपर्ने कामबारे कार्यपत्र प्रश्तुत गर्नुहुनेछ ।
त्यस्तै, वरिष्ठ नेता विद्यादेवी भण्डारीले समसामयीक राष्ट्रिय राजनीति र पार्टीका विषयमा कार्यपत्र प्रश्तुत गर्ने उपमहासचिव भट्टले जानकारी दिनुभयो ।

उपाध्यक्षद्वय रामबहादुर थापा ‘बादल’ र विष्णु पौडेल तथा महासचिव शंकर पोखरेलले अलग–अलग कार्यपत्र पेस गर्नुहुनेछ । भेला काठमाण्डौको बबरमहलमा रहेको कार्की ब्याङ्क्वेटमा हुनेछ । भेलामा पार्टीका संघीय संसद्, प्रदेशसभा र पालिकाका जनप्रतिनिधिलगायत सहभागी हुनेछन् ।

भेलामा गाउँपालिकादेखि केन्द्रीय कमिटी तहसम्मका तीन हजार ४०० भन्दा धेरै प्रतिनिधि सामेल हुने पार्टीको प्रचार विभाग प्रमुख निरज आचार्यले जानकारी दिनुभयो । प्रतिनिधिलाई पालिका चुनावको तयारी तथा पार्टीले गर्नुपर्ने कामबारे लिखित सुझाव दिन आग्रह गरिएको छ ।
भेलाको उद्घाटन पार्टीका अध्यक्ष एवं पूर्वप्रधानमन्त्री केपी शर्मा ओलीले गर्नुहुनेछ ।

आज बिहान ११ बजेपछि हुने उद्घाटनलगत्तै बन्दसत्र शुरु गरी भोलि भेला समापन गर्ने एमालेको तयारी छ । एमालेले भोलि पार्टीको केन्द्रीय कमिटी बैठक पनि बोलाएको छ ।

यो समाचार सेयर गर्नुहोस्
धादिङ अपडेट लेखकको सबै आर्टिकल