धादिङको निलकण्ठ नगरपालिका ४ पौवामा अवस्थित श्री गैरी गाउँ माध्यमिक विद्यालयमा अपाङ्गता भएका बालबालिका, जातिय छुवाछूत तथा लैङ्गिकताको आधारमा हुने विभेदमा न्यूनीकरण देखिएको छ ।
अपाङ्ग कल्याण संघ र ह्याण्डिक्याप इन्टरनेसनलको साझेदारीमा संचालित स्वास्थ र सामाजिक सुरक्षामा अपाङ्गता भएका महिला तथा बालबालिकाहरुको पहुँचमा सहजीकरण परियोजना (AC5) संचालित परियोजना पश्चात विद्यालयमा शिक्षकलाई दिइएको तालीम र समावेशी विद्यालय सुधार योजनाको प्रभावकारिताले परिवर्तन देखिएको विद्यालयका प्रधानाध्यापक धनबहादुर अधिकारीले बताउनु भयो । विद्यार्थी र शिक्षकमा व्यवहारमा सकारात्मक परिवर्तन देखिएको छ ।
उहाँले भन्नुभयो,– लैङ्गिकताको आधारमा हुने विभेद र अपाङ्गता भएकालाई हेर्ने दृष्टिकोणमा सकारात्मक परिवर्तन भएको छ । अपाङ्गता मैत्री भवन निर्माण गर्नु पर्ने रहेछ । हाम्रो विद्यालयको सबै भवन अपाङ्गता मैत्री छैन । संस्था आएपछि मात्र थाहा भयो । अपाङ्गता भएका दुइजना बालबालिका अध्ययनरत छ्न् ।
उनीहरुको शैक्षिक सुधारमा विद्यालयले प्राथमिकता दिइरहेका छौँ, उहाँले भन्नुभयो । परियोजना मार्फत विद्यालय र संस्थाको २/२ लाख गरि ४ लाखमा पहुँचयुक्त शौचालय निर्माण भैरहेको छ । शिक्षक तथा विद्यार्थीमा सहज हुने र स्वास्थ्य क्षेत्रमा सुधार हुने समेत उहाले बताउनु भयो । नगरपालिकाले पनि विद्यालयको भौतिक तथा शैक्षिक सुधारमा ठुलै सहयोग गर्दै आएको छ । आगामी दिनमा गुणस्तरीय शिक्षामा जोड दिन सहयोग मिल्ने अपेक्षा समेत उहाँले राख्नु भयो । परियोजनाले गरेको गतिविधिको अनुगमनको क्रममा यस्तो बताएका हुन् ।
अनुगमनमा नीलकण्ठ नगरपालिकाका उपमेयर दिपक विश्वकर्मा, कार्यपालिका सदस्य चिना श्रेष्ठ, नगरपालिकाका महिला तथा बालबालिका शाखाकी महिला विकास निरीक्षक निर्मला केशी, AC5 परियोजना अधिकृत अमिशा धिमाल लगायतको उपस्तिथिति रहेको थियो । त्यस्तै, नीलकण्ठ नगरपालिका ३ शान्तिटारमा अवस्थित रहेको नमुना बौद्धिक अपाङ्गता आधारभुत विशेष विद्यालयको पनि अनुगमन गरिएको छ । निर्माणाधिन भवनमा परियोजनाले रेलिङ सहयोग गरेको थियो ।
समावेशी विद्यालय सुधार योजनापछि विद्यालयमा निकै सुधार भएको प्रधानाध्यापक शर्मिला रिजालले बताउनु भयो । अहिले ३० जना बालबालिका छन् । उहाँले भन्नुभयो,–संस्थाले रेलिङ सहयोग गरिदिएपछि बालबालिकालाई सुरक्षित राख्न सहयोग भएको छ । लडेर समस्या हुन्छ कि भन्ने चिन्ता मुक्त बनेको छ ।
समावेशी विद्यालय सुधार योजनापछि उनीहरुको व्यवहारमा परिवर्तन भएको छ । बालबालिकालाई आत्मनिर्भर बन्न सिकाइ होस् भनेर खेतबारीमा काम गर्ने बानीको विकास गरेका छौँ ।
