जिल्ला प्रशासन कार्यलय धादिङबाट प्रवाह हुँदै आएको सेवाहरु केही समयका लागि बन्द गरेको छ ।
कार्यलयका कर्मचारी र सेवाग्राहीमा कोरोनाको उच्च जोखीम रहेको भन्दै प्रशासनले शनिबार एक सूचना जारी गरि कात्तिक २ गतेदेखि अर्काे सूचना नभएसम्मको लागि सेवा प्रवाहको काम बन्द गरेको जनाएको छ ।
धादिङमा पछिल्लो समय कोरोना संक्रमणको दर बढ्दै गएको र सेवाग्राहीको भिड अत्याधिक बढेका कारण अत्यावश्यक सेवा बाहेक अन्य सेवाहरु बन्द गरिएको प्रशासनले जनाएको छ । सरोकारवाला निकायको परामर्शपछि कार्यलयले नयाँ नेपाली नागरिकता वितरण, नागरिकता प्रतिलिपि वितरण, हातहतियार दर्ता, नवीकरण संस्था दर्ता पत्रपत्रिका दर्ता सेवाको कार्य बन्द गरेकोे हो ।
यस्तै निजी सुरक्षा कम्पनी, नवीकरण राहदानी वितरण, नाबालिग परिचयपत्र वितरण अन्य अत्यावश्यक नभएका सेवाहरु स्थगित गरिएको हो । शान्ति सुरक्षासम्बन्धी सेवा, ठाडो निवेदन र उजुरीसम्बन्धी सेवा, मुद्दाको सुनुवाइसम्बन्धी सेवा, विपद व्यवस्थापनसम्बन्धी सेवाहरु भने नियमित संचालन रहने प्रशासनले जनाएको छ ।
अत्यावश्यक सेवाका लागि जिल्ला प्रशासन कार्यालय परिसरमा प्रवेश गर्ने सेवाग्राहीले सरकारले तोकेको स्वास्थ्य मापदण्ड अनिवार्य पालन गर्न अनुरोध पनि भनिएको छ ।
