नेपाल प्रहरीको काम शान्ति सुरक्षा तथा सुव्यवस्था कायम गर्न हो, ट्राफिक प्रहरीको सवारी आवागमन सहज बनाउनु हो । सवारीको उच्च चाप रहेका राजमार्गहरुमा ट्राफिक प्रहरीको ड्यूटी भ्याइ नभ्याइ छ । तर पनि धादिङमा प्रहरीहरुले सवारी साधन मात्र नभएर यात्रुहरुलाई पनि बाटो काट्न सहयोग गर्न थालेका छन् ।
बालबालिका, वृद्धवृद्धा र अपाङ्गता भएका, दृष्टिविहिन जस्ता अपाङ्गताहरुलाई बाटो काटन मद्दत गर्न थालेका हुन् । यात्रुलाई सहज बनाउन र राजमार्गमा हुने दुर्घटना न्यूनिकरणका लागि केहि नेपाल प्रहरीले यो कामको शुरु गरेका हुन् ।
ट्राफिक प्रहरी कार्यालय गजुरीमा कार्यरत हबल्दार सुधिर गिरी दृष्टिविहीन नारायण सिंग्देल र बालिकालाई पृथ्वीराजमार्गमा बाटो कटाउँदै गरेको अवस्थामा भेटिए । पृथ्वीराजमार्गमा चल्ने सवारी साधनको चेकिङ र सवारी आवागमन सहज बनाउन खटिने गिरी हरेक दिन बिहान र बेलुकाको समयमा पैदल यात्रुलाई बाटो काटन मद्दत गर्दै आएकोबताउनुभयो । ट्राफिक नियमको पालना सुरक्षाका लागि हो । उहाँले भन्नुभयो – बाटो काट्ने क्रममा धेरैको ज्यान गइसकेको छ । सवारी साधनको चाप, उस्तै तिव्र गतिले मानिसको ज्यानको क्षति भइरहेको छ । अब कसैले ज्यान गुमाउन नपरोस् भनेर यो अभियान चलाएको उहाँले बताउनुभयो ।
पैदल यात्रुलाई बाटो काटन सहयोग गर्ने गिरी मात्र होइनन् । धादिङमा धेरै प्रहरीहरुले यात्रुलाई बाटो काट्न सहयोग गरिरहेका छन् । इलाका प्रहरी कार्यालय गजुरीका प्रहरी हवलदार उमेश पण्डितको जिम्मेवारी शान्ति सुरक्षा र अमनचयनका लागि खट्नुभएको हो । तर आफ्नो ड्यूटी बाहेकका समय र फुर्सदका समयमा राजमार्गमा यात्रा गरिरहेकाहरुलाई बाटो काट्न सहयोग गर्दैमा वित्छ । थोरै समयले कसैको ज्यान सुरक्षामा सहयोग पुग्छ भने किन नगर्ने मुस्कुराउदै भन्नुभयो ।
ग्रामिण क्षेत्रमा गुणस्तरहिन सडक सञ्जाल, धादिङमा रहेको दुइ ठूला राजमार्गहरुमा सवारी साधनको उस्तै चाप र तिव्र गति । आम नागरिक तथा चालकलाई सचेतना दिनका लागि पनि उनीहरुको यो काम उदाहरणीय बन्दै गएको छ । नेपाल प्रहरीले सुरु गरेको अभियानमा स्थानीयले पनि साथ दिन आवश्यक रहेको स्थानीय शिक्षक रोशन न्यौपानेले बताए । ट्राफिक नियमको पालना गर्ने हो भने संभावित दुर्घटनाबाट बच्न सकिने उहाँको भनाई छ । पैदल यात्रुलाई बाटो काटन मद्दत गर्ने गजुरी स्थित ट्राफिक प्रहरीको काम तारिफ योग्य छ । गजुरीमा कार्यरत प्रहरीले जस्तै अन्य स्थानका प्रहरीले यस्ता उदाहरणीय काम गर्न सके प्रहरी मेरो साथी नाराले सार्थकता पाउने देखिन्छ ।
