धादिङको नीलकण्ठ नगरपालिका वडा-९ काफलपानीमा रहेको क्ष्योलिङ गुम्बालाई लगभग ३ केजिको बुद्धको मुर्ती उपहार स्वरूप प्रदान गरिएको छ ।
स्थानिय समाजसेवी ईश्वर गुरूङले उक्त बुद्धको मुर्ती गुम्बा व्यवस्थापन समितिलाई प्रदान गर्नुभएको गुम्बा व्यवस्थापन समितिका अध्यक्ष कृष्णबहादुर गुरुङले जानकारी दिनुभयो ।
मुर्ती प्रदान गर्नुभएका समाजसेवी ईश्वर गुरूङलाई खादा लगाएर सम्मान समेत गरिएको थियो । बौद्ध धर्मावलम्वीहरूको पुजा पाठ, ध्यान गर्न र आन्तरिक तथा बाह्य पर्यटक वृद्दि गर्ने उदेश्यले २०७४ सालमा बागमती प्रदेश सरकारको बजेटमा निर्माण सुरू भएको यस गुम्बा बजेट अभावले अझै सम्पन्न हुन सकेको छैन ।
१०० भन्दा बढी घरधुरी गुरुङ समुदायको बस्ती रहेको काफलपानी गुरूङ गाउ नजिक जिल्लाकै प्रमुख धार्मिक स्थल जलमुखी मन्दीरको कारण पनि प्रख्यात छ ।
हरेक पुर्णिमाको दिन विशेष पुजाआरधना र मेला लाग्ने यस मन्दीरमा धादिङ लगायत नुवाकोट, रसुवा, काठमाण्डौंका भक्तजनहरु आउने गर्दछन् । साथै यहाँ बाट नेपालकै दोस्रो ठूलो टार सल्यान्टारका साथै साबिकको ५० वटै गाबिस देख्न सकिन्छ।
