हङकङको ताई पो क्षेत्रमा भएको आगलागीमा ज्यान गुमाउनेको सङ्ख्या ५५ पुगेको छ । ताई पो क्षेत्रमा रहेको वाङ्फुक कोर्ट नामक विशाल हाउजिङ कम्प्लेक्समा आगो लाग्दा २ सय ७९ जनाभन्दा धेरै मानिस हराइरहेको बीबीसीले जनाएको छ ।
आगलागीबाट प्रभावित ७ भवनमध्ये ४ वटामा आगो निभेको र बाँकी रहेका आगो बेलुकासम्म निभाउने अधिकारीहरूले आशा व्यक्त गरेका खबरमा उल्लेख छ ।
प्रहरीले निर्माण कम्पनीका तीन जनालाई पक्राउ गरेको छ । भवन निर्माणमा लापर्बाही गरेको आरोपमा कम्पनीका दुई जना सञ्चालक र एक जना सल्लाहकारलाई पक्राउ गरेको प्रहरीले जनाएको छ ।
आगो शुरू हुँदा कम्प्लेक्सको मर्मत भइरहेको थियो । गुणस्तरहीन निर्माण सामग्रीको कारण आगो छिटो फैलिएको अग्नी नियन्त्रकहरूले बताएका प्रहरीले जनाएको छ ।
विगत ६० वर्षयता भएको आगलागीमध्ये यो नै सबैभन्दा ठूलो भनिएको छ । वाङ्फुक कोर्टमा ८ वटा ३१–३१ तलाका अग्ला भवनहरू थिए । सन् २०२१ को जनगणना अनुसार ती बहुतले भवनहरूमा १ हजार ९ सय ८४ वटा अपार्टमन्ट थिए । ती अपार्टमेन्टमा ४ हजार ६ सय जना मानिसहरू बस्थे ।
आगो निभाउन ७ सय ६७ जना अग्नि नियन्त्रकका साथै १ सय २८ दमकल, ५७ एम्बुलेन्स र झन्डै ४ सय प्रहरी खटाइएका छन् । आगलागीको कारण खुलेको छैन ।
