मंसिर १५ ,धादिङ
प्रधानमन्त्री केपी शर्मा ओलीको विशेष निमन्त्रणामा एशिया प्रशान्त शिखर सम्मेलनमा भाग लिन म्यान्मारका स्टेट काउन्सिलर आङ सान सु की गत विहिबार नेपाल आउनुभएको थियो । नेपाल र मित्र राष्ट्र म्यान्मारबीच औपचारीक रुपमा पहिलो पटक शुक्रबार व्यापार र लगानीसम्बन्धी सम्झौता भएको छ । प्रधानमन्त्री केपी शर्मा ओली र नेपालको औपचारिक भ्रमणमा रहनुभएका म्यान्मारका स्टेट काउन्सिलर आङ सान सु कीबीच भएको भेट र द्विपक्षीय वार्तापछि उहाँहरुको उपस्थितिमा सम्झौतामा हस्ताक्षर भएको हो । सम्झौतामा नेपालका तर्फबाट परराष्ट्रमन्त्री प्रदीपकुमार ज्ञवाली र म्यान्मारका तर्फबाट अन्र्तराष्ट्रिय व्यापार सहकार्य मन्त्री यु क्यो टिनले हस्ताक्षर गर्नुभएको छ ।
नेपाल र म्यान्मारबीचको व्यापारीक सम्झौताले खासगरी खाद्यान्न, पर्यटन र कला, संस्कृति आदान–प्रदानको क्षेत्रमा थप लगानी र व्यापारका लागि नयाँबाटो खोलेको छ । दुईपक्षीय वार्तामा सहभागी प्रधानमन्त्री ओलीका परराष्ट्र सल्लाहकार डा. राजन भट्टराईका अनुसार दुई देशबीच व्यापार र आर्थिक गतिविधि बढाउने, लुम्बिनीमा अन्र्तराष्ट्रिय विमानस्थल निर्माण भएपछि दुई देशबीच सीधा हवाई सम्पर्क स्थापना गरिनेछ । नेपालले सन् २०२० का लागि घोषणा गरेको नेपाल पर्यटन वर्षमा म्यान्मारबाट पर्यटक वृद्धि गराउन म्यान्मारले सहयोग गर्ने समझदारी भएको बताउनुभयो । साथै प्रधानमन्त्री ओली र सु कीबीच बहुपक्षीय प्राविधिक तथा आर्थिक सहकार्यका लागि बङगालको खाडीको प्रयास बिम्स्टेकलाई थप सक्रिय बनाउन दुवै पक्षले काम गर्ने विषयमा पनि छलफल भएको थियो ।
