फागुन २३, धादिङ ।
१०९ औं अन्र्तराष्ट्रिय श्रमिक महिला दिवशको अवसरमा लैंगिक समानता सम्बन्धी कचहरी नाटक ‘सोच’ मञ्चन गरिएको छ ।
धादिङको गल्छी गाउँपालिकाको महेश दोभानमा नाटक मञ्चन गरिएको हो । नाटकमा महिला माथी हुने हिंसा, छोरा र छोरीमा गरिने विभेद, अपाङ्गता भएकाहरुलाई समाजले हेर्ने दृष्टिकोण लगायतका विषयहरु समावेश गरिएको थियो ।
धादिङ नाट्य समाजका कलाकारहरु शालिकग्राम अधिकारी, सुदिप अर्याल, प्रविण घिमिरे, सम्झना तामाङ, सुनिता रिजाल, रेखबहादुर गुरुङ लगायतले नाटकको विषय वस्तुमा रहेर नाटक प्रस्तुत गर्नुभएको थियो । कार्यक्रमकै अवसरमा गाउँपालिका भित्र रहेका एकल महिलाहरुलाई रातो अविर र रातो पछ्याउरा ओढाएर सम्मान पनि गरिएको थियो ।
श्रीमान वितिसकेपछि महिलाहरुले सेतो लगाउनुपर्छ भन्ने कूरितिलाई निर्मूल पार्ने उद्देश्यले एकल महिलाहरुलाई रातो लगाएर सम्मान गरिएको आयोजकले जनाएको छ । गल्छी गाउँपालिकाको आयोजना तथा सुआहारा, अपाङ कल्याण संघ धादिङ र अम्लेश्वर महिला विकास कृषि सहकारी संस्था लिं.को संयुक्त सहयोगमा कार्यक्रम सञ्चालन भएको हो ।
कार्यक्रमकै अवसरमा लैङ्गीक समानता विषयक वक्तृत्वकला प्रतियोगीतामा प्रथम, द्धितिय र तृतिय हुने विजयी विद्यार्थीहरुलाई क्रमश नगद ५ हजार, ३ हजार, २ हजार र १ हजार ५ सय नगद पुरस्कार वितरण गरिएको थियो ।
फोटो हेर्नुहोस्:-
तस्विर : शालिकग्राम अधिकारी/प्रविण घिमिरे
