घाँटीको हड्डी भाँचिएर ओछ्यानमा थला परेका निलकण्ठ नगरपालिका वडा नम्बर ९ गैह्राबारीका शिबकुमार श्रेष्ठलाई मकाउको ग्यालेक्सी क्यासिनोमा कार्यरत नेपालीहरुले सहयोग गरेका छन् । आर्थिक अभावका कारण उपचार गर्न नसकी डेढ वर्षदेखि ओछ्यानमै थला परेका श्रेष्ठलाई मकाउमा कार्यरत नेपालीहरुले ५१ हजार आर्थिक सहयोग गरेको छ ।
बारिको कान्लाबाट लडेर घाँटीको हड्डी भाँचिएपछि श्रेष्ठलाई शरीर हलचल गर्न समस्या हुन्छ । घाइते श्रेष्ठले उपचारको लागि ट्रमा सेन्टर काठमाण्डौैंमा १० लाख नगद खर्च गरिसक्नुभयो । उपचार गर्दागर्दै अस्पतालले थप उपचारको लागि नसा सम्बन्धी अस्पतालमा जान भनेपछि खर्च अभाबले उपचार गर्न नसकी घरमै थलिनुपरेको श्रेष्ठकी श्रीमती धनमाया श्रेष्ठले बताउनुभयो ।
घरमा भएको अलिकति पैसा र ऋण गरेर पनि १० लाख खर्च भइसक्यो , आम्दानीको बाटो नभएपछि श्रीमान्को थप उपचार गर्न नसकेको श्रीमती धनमाया श्रेष्ठले बताउनुभयो । अहिले घरमुली नै ओछ्यानमा थला परेपछि श्रेष्ठ दम्पलीलाई छोरिहरुको पालन पोषण गर्न र घर व्यवहार चलाउन समस्या भएको छ । तर पनि सधै उज्यालो अनुहार लिएर बस्ने ४५ वर्षिय शिबकुमार श्रेष्ठलाई उपचार गर्न सके हिडडुल गर्न सक्ने आशा छ । तर पैसा नहुदा उहा ओछ्यानमै सुतेको डेढ वर्ष भयो ।
श्रेष्ठको समस्या स्थानीयबाट थाहा पाएपछि मकाऊमा रहेका मुरलीभञ्ज्याङका नविन धमलाले आफु काम गर्ने ग्यालेक्सी क्यासिनोमा कार्यत नेपाली सेक्युरिटीहरुबाटै ५१ हजार रुपैंया सहयोग संकलन गरि पठाएको प्रयास रेग्मीले जानकारी दिनुभयो । सधै सामाजिक सेवामा रुचि राख्ने नविन धमलाले पठाई दिएको उक्त रकम स्थानीय प्रयास रेग्मी, खिलबहादुर धमला, नेकपा ९ नम्वर वडा कमीटीका अध्यक्ष भक्त बहादुर रेग्मी लगाएतले शनिबार बिहान विरामी शिव कुमार श्रेष्ठलाई हस्तान्तरण गरेका छन् ।
रकम हस्तान्तरण गर्दै अध्यक्ष भक्त बहादुर रेग्मीले यो रकम श्रेष्ठको उपचारका लागि प्रयाप्त नभएकोले अन्य सहयोगीहरुलाई यो उपचार अभियानमा हातेमालो गर्न समेत आग्रह गर्नुभएको छ ।
