धदिङ अस्पतालले आजबाट भेन्टिलेटर सहितको आइसियू सेवा सघन उपचार कक्ष संचालनमा ल्याएको छ । बाग्मती प्रदेशअन्तर्गत भक्तपुर र हेटौडा पछि धादिङ अस्पतालमा भेन्टिलेटर सहितको सेवा शुरु भएको तेस्रो अस्पताल हो । धादिङ अस्पतालको सघन उपचार कक्षको उद्घाटन गर्दै मन्त्री दुलालले अस्पतालको भौतिक संरचना, उपकरण तथा जनशक्ति व्यवस्थापनमा सरकारले पहल गर्ने बताउनुभयो । यस्तै सरकारले व्यवस्थापन गर्ने सेवा सुविधालाई अस्पताल परिवारले पनि सही ढंगले सदुपयोग गर्न मन्त्री दुलालले आग्रह गर्नुभयो ।
यस्तै फरक प्रशंगमा बोल्दै मन्त्री दुलाले संविधान सभा संकटमा परेको बताउनुभयो । राजनिति आफैमा जटिल विधा हो भन्दै लामो समयको प्रयास र निकै दुःखले पाएको संविधान जोगाउन सकिएन भने ठूलो विपत्ति खेप्नुपर्ने बताउनुभयो । संविधान जोगाउन नसक्नु भनकै विनाश रोज्नु हो । त्यसैले संविधान जोगाउन अपरिहार्यता रहेको बताउनुभयो ।
यस्तै कार्यक्रममा अस्पताल व्यवस्थापन समितिका अध्यक्ष महेन्द्र धमलाले सामान्य विरामी बाहेक प्रायः विरामीहरुको उपचार गर्न काठमाडौं लगायत अन्यत्र ठाउँहरुमा रेफर गर्ने धादिङ अस्पतालको सेवा तथा सुविधामा सुधार आउन थालेको बताउनुभयो । सेवाग्राहिको मागलाई मध्यनजर गरी केहि महिना यता सेवालाई चुस्त दुरुस्त तथा गुणस्तरिय सेवा प्रवाह भैरहेको बताउनभयो ।
धादिङ अस्पताललाई रेफर अस्पतालको दाग लागेको छ । तर सेवा तथा सुविधा प्रवाहमा कत्तिपनि कमी नगरेको अस्पताल व्यवस्थापन समितिका अध्यक्ष महेन्द्र धमलाले बताउनुभयो । बाग्मती प्रदेश सामाजिक विकास मन्त्रालय मार्फत अस्पताललाई ४ वटा भेन्टिलेटर र १० बेडको आइसियू प्राप्त भएको छ । दुइ वटा भेन्टिलेटर आउन बाँकी छ । यि उपकरण तथा प्रविधिको प्रयोग गरी धादिङबासीलाई जिल्लामै पर्याप्त सेवा दिने अध्यक्ष धमलाले बताउनुभयो ।
