नेपाल बार एसोसिएसनले आज आफ्नो ६५ औँ स्थापना दिवस मनाएको छ ।
बार एसोसिएसनको स्थापना २०१३ साल पुस ७ गते भएको हो । बार दिवसका अवसरमा बारका देशैभरका शाखाले विभिन्न कार्यक्रम गरेका छन् । यस क्रममा धादिङ जिल्ला अदालत बार इकाइले आज आफ्नै सभाहलमा शुभकामना आदानप्रदान कार्यक्रम आयोजना गरेको थियो ।
विधिको शासन, स्वतन्त्र न्यायपालिका, मानवअधिकार, लोकतन्त्र र पेसागत हकहित तथा मर्यादालाई केन्द्रमा राखेर बार एसोसिएसनले काम गर्न कार्यक्रमका सहभागिहरुले सुझाव पनि दिएका छन् । कार्यक्रममा धादिङ जिल्ला अदालतका न्यायाधिष देवेन्द्र पौडेलले अदालत र बारबीच सुमधुर सम्बन्ध हुनुपर्ने धारणा राख्नुभयो । न्यायाधिष पौडेलले बार र बेन्चबीच परिपूरक सम्बन्ध हुनुपर्छ, दुवै स्वतन्त्र न्यायपालिकाको संरक्षण गर्ने निकाय हुन् त्यसैले एकले अर्कासँग प्रतिस्पर्धा गर्नुपर्ने अवस्था नरहेको पनि बताउनुभयो ।
त्यसैगरि अर्का न्यायाधिष आत्मदेव जोशीले सक्षम र इमान्दार न्यायाधीश र वकिलको उद्देश्य नागरिकलाई न्याय दिनु नै हो, बार र बेन्चको भूमिका अलगजस्तो देखिए पनि दुवै एकअर्कामा सम्बन्धित छन्, दुुवैले एकअर्कालाई सम्मान गर्नुपर्छ भन्नुभयो । इकाइ अध्यक्ष कृष्णराज अधिकारीको अध्यक्षतामा भएको कार्यक्रममा धादिङका प्रहरी प्रमुख, प्रहरी उपरिक्षक महेन्द्र खड्काले अनुसन्धानमा खटिएका प्रहरी अधिकृत र अधिवक्ताहरुले न्यायका लागि प्रमाण संकलन गर्ने हो प्रमाण सिर्जना गर्ने होइन भन्ने धारणा राख्नुभयो ।
कार्यक्रममा सहायक न्यायाधिवक्ताहरु नारायण घिमिरे, धादिङ उद्योग बाणिज्य संघका अध्यक्ष रुद्रबहादुर खत्री, नेपाल पत्रकार महासंघ धादिङका सचिव राजाराम शर्मा लगायत धादिङ बारका पदाधीकारी तथा सदस्यहरुले आ–आफ्ना विचार व्यक्त गर्नुभएको थियो ।
