धादिङ साईकिलिङ ग्रुपले आज सदरमुकाम धादिङबेसीमा साईकल उत्सव मनाएको छ ।
‘धादिङ कोरा’ नाम दिईएको साईकल उत्सवमा १ सय ३० भन्दा बढि साईकल प्रेमीहरु सहभागी थिए । स्वस्थ जीवन र स्वच्छ वातारणको लागि साईकल चढौं भन्ने सन्देश प्रवाह गर्ने उद्देश्यले पहिलो पटक धादिङ कोराको आयोजना गरिएको धादिङ साईकिलिङ ग्रुपका लिडर नन्दुकुमार घले (मोलम दोर्जे)ले बताउनुभयो ।
धादिङबेसी आसपासमा रहेका मठ मन्दिरहरुलाई परिक्रमा (कोरा) गरि साईकल उत्सव मनाएको हो । नेपालको २५ भन्दा बढि जिल्लामा साउन महिनामा साईकल उत्सव मनाउँदै आएको घलेले बताउनुभयो । हिन्दु र बौद्ध धर्मावलम्वीहरुको पवित्र महिनाको रुपमा लिईदै आएको साउन महिनामा साईकल प्रेमीहरुले साईकल उत्सव मनाउँदै आएका छन् । अन्य जिल्लाहरुले साउनको पहिलो हप्ता साईकल उत्सव मनाईसकिएको भएपनि धादिङ र बारा जिल्लामा भने आज मनाएको हो ।
धादिङमा पहिलो पटक मनाईएको साईकल उत्सव कार्यक्रमलाई विभिन्न संघ संस्थाहरुले सहयोग गरेको थियो । कभर्डहलबाट सुरु भएको साईकल यात्रा धादिङबेसीमा आसपासमा रहेका विभिन्न मठ मन्दिरहरुलई परिक्रमा गरि पुनः कभर्ड हलमै पुगी समापन गरिएको थियो ।
धादिङ साईकिलिङ ग्रुपले विभिन्न दिवस तथा उत्सवहरुमा जनचेतनामुलक साईकल ¥यालीको आयोजना गर्दै आएको छ ।
