धादिङ तमू समाज काठमाण्डौं उपत्यकाले अप्लास्टिक एनिमिया जस्तो गम्भीर रोगबाट पीडित शरण गुरुङको उपचारका लागि “शरण गुरुङ बचाउ अभियान” सञ्चालन गरेको छ ।
धादिङको नीलकण्ठ नगरपालिका–९ काफलपानी निवासी २३ वर्षीय शरण गुरुङ गम्भीर रोग अप्लाष्टिक एनिमियाबाट पीडित भई हाल जीवन र मृत्युको संघर्षमा रहेका छन्। परिवारका अनुसार शरणको उपचार नेपालमा सम्भव नभएकाले विदेशमा उपचार गर्नुपर्ने अवस्था रहेको छ। तर आर्थिक अवस्था कमजोर भएका कारण उपचारमा ठूलो चुनौती देखिएपछि यतिबेला धादिङ तमू समाज काठमाण्डौं उपत्यकाले विभिन्न संघ–संस्था, विदेशमा रहेका नेपाली तथा शुभेच्छुकहरूलाई आर्थिक सहयोगका लागि अपिल गर्दै अभियान सुरु गरेको धादिङ तमू समाज काठमाण्डौं उपत्यकाका अध्यक्ष सन्तबहादुर गुरुङले बताउनुभयो ।
विभिन्न व्यक्तिहरूले आर्थिक सहयोग समेत गर्न थालेको उहाँले बताउनुभयो । परिवारका अनुसार शरणको उपचारका लागि नेपालका विभिन्न अस्पतालहरूमा प्रयास गरिए पनि अपेक्षित सुधार हुन नसकेपछि थप उपचारका लागि भारत लैजानुपर्ने अवस्था आएको छ । उपचारका लागि करिब ३५ देखि ४० लाख रुपैयाँ खर्च हुने परिवारले बताएको छ ।
धादिङ तमू समाज काठमाण्डौं उपत्यकाले गम्भीर रोग लागेका बिरामीहरुको उपचारमा विगतमा पनि सहयोग गर्दै आएको छ ।
