नेपाल इन्भेष्टमेन्ट मेगा बैंक लिमिटेड शाखा कार्यालयल धादिङ र धादिङ इन्टरनेशनल कार्गो सर्भिस (धादिङ कुरियर सेवा) बीच सेवा सहकार्य सम्बन्धी सम्झौता भएको छ । दुवै पक्षबीच आज सझदारीपत्रमा हस्ताक्षर भएको हो ।
सम्झौता अनुसार बैंकका ग्राहक, डेबिट÷क्रेडिट कार्ड प्रयोगकर्ता, बैंकको एनआईएमबी स्मार्ट प्रयोगकर्ता तथा कर्मचारीहरूले धादिङ इन्टरनेशनल कार्गो सर्भिस मार्फत अन्तर्राष्ट्रिय तथा आन्तरिक कुरियर सेवामा विशेष छुट पाउनेछन् । सम्झौताअनुसार धादिङ इन्टरनेशनल कार्गो सर्भिसले ५ केजीसम्मका अन्तर्राष्ट्रिय कुरियर सेवामा ५ प्रतिशत छुट, २० केजीसम्म १० प्रतिशत छुट तथा आन्तरिक कुरियर सेवामा पनि १० प्रतिशत छुट उपलब्ध गराउनेछ।
साथै धादिङ इन्टरनेशनल कार्गो सर्भिसले बैंकमार्फत सामाजिक सञ्जाल, इमेल, एसएमएस लगायत माध्यमबाट आफ्ना सेवाबारे जानकारी प्रवाह गर्न सहकार्य गर्नेछ। त्यसैगरी, बैंकले आफ्ना ग्राहक तथा कर्मचारीहरूलाई उक्त सुविधाबारे जानकारी गराउने, आफ्ना कार्यालय, वेबसाइट, एटिएम तथा सामाजिक सञ्जालमार्फत प्रचारप्रसार गर्ने र कार्गो सर्भिसका योजनाहरू ग्राहकसम्म पु¥याउने सम्झौता भएको छ ।
५ वर्ष सम्मको लागि भएको सम्झौतामा दुवै पक्षको आपसी सहमतिमा सम्झौता नवीकरण गर्न सकिनेछ भने आवश्यक परे ३० दिनको लिखित सूचनासहित कुनै पनि पक्षले सम्झौता अन्त्य गर्न सक्ने व्यवस्था गरिएको छ । सम्झौतामा एनआईएमबी बैंकको तर्फबाट शाखा प्रबन्धक सुबास अर्याल र कार्गाे सर्भिसका तर्फबाट प्रबन्ध निर्देशक प्रेम बहादुर नेपाल क्षेत्रीले हस्ताक्षर गर्नुभएको छ ।
यस सहकार्यले बैंकका सेवाग्राहीलाई सहज र सुलभ कुरियर सेवा उपलब्ध गराउने विश्वास गरिएको छ । धादिङ इन्टरनेशनल कार्गो सर्भिसले नेपाल लगायत विश्वकको जुनकुनै देशमा पनि थोरै शुल्कमा सामान पठाउदै आएको छ ।
