(Remittance)
सदरमुकाम धादिङबेशीमा रहेको एक मात्र आइएमइ कला इन्टरनेशनल प्रालिले १ महिनाको अवधिमा रेमिट्यान्स १२ प्रतिशतले वृद्धि भएको जानकारी दिएको छ । कला इन्टरनेशनल प्रालिले पछिल्लो एक महिनामै ३३ करोड ४० लाख ५५ हजार ९ सय ९० रुपैया रेमिट्यान्स भित्राएको प्रबन्धक रामचन्द्र गिरिले जानकारी दिनुभयो ।
जबकी साउन र भदौ २ महिनामा ४९ करोड ३३ लाख ६० हजार ३ सय ५० रुपैया मात्र रेमिट्यान्स भित्राएको थियो । यस्तै साउन महिनादेखि आजसम्म ३ महिनाको अवधिमा ८२ करोड ८९ लाख १ हजार ३ सय ४० रुपैया रेमिट्यान्स भित्राएको प्रबन्धक गिरिले बताउनुभयो ।
यो वर्ष कोरोना भाइरसको महामारीका कारण रेमिट्यान्स घट्ने चिन्ता थियो तर चाडपर्व पनि नजिकिनु र विदेशबाट हुण्डी गरेर पैसा पठाउने काम पनि बन्द भएसँगै आइएमइ गरेर पैसा पठाउने क्रम बढेको प्रबन्धक गिरिले जानकारी दिनुभयो । यो एक महिनाको अवधिमा रेमिट्यान्स १२ प्रतिशतले वृद्धि हुनु सन्तोषजनक नै रहेको प्रबन्धक गिरिले बताउनुभयो ।
