नगरपरिषद् स्थलमा धर्ना बसेको भन्दै संयुक्त दलित संघर्ष समितिको धर्ना कार्यक्रमलाई प्रहरीले हस्तक्षेप गरेको छ । निलकण्ठ नगरपालिकाको नगरसभा सुरु हुन अघि नै कार्यक्रमस्थल बाहिर धर्ना बसेका दलित अगुवाहरुलाई प्रहरीले तितरवितर पारेका हुन् ।
निशुल्क शिक्षाका लागि १२ बुदे माग राखेर ४ महिनादेखि धादिङका दलित अगुवा आन्दोलनरत छन् । नगरपालिकाले दलित समुदायको मागलाई बेवास्था गरेको भन्दै दलित अगुवाहरु आज नगसभा स्थलमा नै धर्ना दिन पुगेका थिए । प्रहरीले हस्तक्षेप गरेपछि केही समय सामान्य झडप समेत भएको दलित अगुवा गणेश बराईलीले बताउनुभयो ।
झडपमा परि दलित अगुवा राम बहादुर बसेल, नवराज मजाकोटी लगायतका व्यक्तीहरु घाईते समेत भएको उहाँले बताउनुभयो । महिनौदेखि आफुहरुको माग लिएर नगरपालिका धाउदा पनि माग सम्बोधन हुने छाट नदेखिएकोले नगरसभा भएकै स्थानमा धर्ना दिन जाँदा प्रहरी प्रशासन लगाएर लाठीचार्ज गरेको दलित नेता गोपाल विश्वकर्माले बताउनुभएको छ ।
सोमबार आयोजित नगरसभा अघि नै शान्तिपुर्ण धर्नामा बसेका थियौं तर दलितमाथि मेयर भिम प्रसाद ढुंगानाको निर्देशनमा प्रहरीले हस्तक्षेप गरेको उहाँको आरोप छ । यता नगरपालिकाले भने नगरसभा नै विथोल्ने नियतले दलित अगुवाहरु प्रस्तुत भएपछि प्रहरी परिचालन गर्नु परेको जनाएको छ ।
जिल्ला प्रहरी कार्यालय धादिङका प्रमुख प्रहरी उपरिक्षक महेन्द्र खड्काले भिडभाड धेरै भएकोले भिड नियन्त्रण मात्रै गर्न खोजेको बताउनुभयो । प्रशासानले निषेधाज्ञाको समयमा सभा, सम्मेलन, भेला, धर्ना जस्ता कार्यक्रमहरु बन्देज लगाएका कारण कोभिडको बेला यस्तो नगर्नुस मात्र भनेका हौं, केही गरेकै छैनौं घाईते कसरी भयो ? प्रमुख प्रहरी उपरिक्षक खड्काले बताउनुभयो ।
‘अनिवार्य तथा निःशुल्क शिक्षा सम्बन्धि ऐन २०७५’ को परिक्षेद २ (८) मा ‘आर्थिक रुपले विपन्न, अपाङ्गता भएका र दलित नागरिकलाई निःशुलक उच्च शिक्षा प्राप्त गर्ने अधिकार हुनेछ ।’ भनी उल्लेख छ । तर, केन्द्र, प्रदेश वा स्थानीय सरकारको जिम्मेवारी प्रष्ट नभएकोले समस्या उत्पन्न भएको निलकण्ठ नगरपालिकाका मेयर भिमप्रसाद ढुंगानाको भनाई छ ।
नीलकण्ठ नगरपालिकाले संविधान विपरित दलित समुदायको छात्रवृत्ति कटौती गरेको भन्दै दलितहरु अगुवाहरुले आन्दोलन गर्न छोडेका छैनन् । संयुक्त दलित संघर्ष समिति बनाएर गत फागुन महिनादेखि नै निशुल्क शिक्षासहित विभिन्न १२ बुँदे माग अघि सारेर आन्दोलन गरिरहेका छन् ।
