लाप्साङकर्पो हिमाल क्षेत्र ओरपर बसोबास गर्ने तामाङ समुदायले प्रयोग गर्ने सकारात्मक उखानहरुको संग्रह “तामाङ आन” को शनिबार धादिङबेसीमा विमोचन गरिएको छ ।
खासगरि धादिङको उत्तरी हिमाली क्षेत्रमा बसोबास गर्नेहरुले प्रचलनमा ल्याएका उखानहरु बाबुराम फ्युवाले संकलन गरेर पुस्तक प्रकाशन गर्नु भएको हो । रुबीभ्याली गाउँपालिका अध्यक्ष रामसिंह तामाङ, गंगाजमुना गाउँपालिका अध्यक्ष भक्त लामा, खनियाबास गाउँपालिका उपाध्यक्ष सेकेमान तामाङ लगायतले सामुहिक रुपमा पुस्तकको बिमोचन गर्दै यसले तामाङको भाषा संस्कृति संरक्षण गर्न योगदान गर्ने बताउनुभयो ।
५२ पृष्ठको “तामाङ आन” उखान संग्रह पुस्तकमा १ सय ४८ ओटा उखान टुक्का लगायत यसको वर्णनहरु समेत उल्लेख गरिएको छ । उक्ति ठट्टा, रमाइलो, भोगाइ, जिवन यापन, संस्कृति र कामका बारेमा समूदायले भोग्दै भन्दै, सुन्दै आएका उखानहरु लोप हुनबाट बचाउनका लागि पहिलो पटक तामाङ, देवनागरिक, सम्भोटा र अंग्रेजी लिपि र तामाङ र अंग्रेजी भाषामा उखानहरुलाई संकलन गरेर पुस्तकाकार दिइएको धादिङको खनियाबास गाउँपालिका दार्खा निवासी लेखक बाबुराम फ्युवाले बताउनुभयो ।
पुस्तक विमोचन कार्यक्रममा बोल्दै टिप्पणीकारहरुले स्थानीय सरकारले भाषा संरक्षण गर्दै स्थानीइ पाठ्यक्रममा राख्न, यसलाई मुख्य शब्दको रुपमा भाषा विकास गर्न सघाउन आग्रह गर्नुभएको थियो ।
