तस्विर : धादिङ पोष्ट
सदरमुकाम धादिङबेसीस्थित शान्तबजारमा बस्ने स्वास्थ्यकर्मी प्रतिमा तिमल्सिनाको कोठामा चोरी भएको छ । बुधबार बन्द गरेर गएको कोठामा ताल्चा नै फोरेर दराजभित्र राखेको नगद २ लाख चोरी भएको तिमल्सिनाले जानकारी दिनुभयो ।
साँझ कोठामा आएर हेर्दा मात्र चोरी भएको थाहा पाएको र प्रहरीलाई खबर गरेको तिमिल्सीनाले बताउनुभयो । तिमिल्सीनाले धादिङवेशीं शान्तबजार स्थित धादिङ हेल्थ केयर प्रा.लि नामक मेडिकल संञ्चालन गर्दै आउनुभएको छ भने सिद्धलेक गाउँपालिकाको स्वास्थ्य शाखामा पनि कार्यरत हुनुहुन्छ ।
प्रतिमा तिमल्सिनाको कोठा नजिकै रहेको कोठाको ढोका समेत चोरले फुटाएको छ । आफु दिउँसो अफिस गएको समयमा कोठाको ढोका फुटाईराखेको अवस्थामा फेला परेको सुनिल ईटनीले बताउनुभयो ।
धादिङवेशींमा अरुपनि यस्ता घटनाहरु आफुले सुनेको बताउदै ईटनीले चोरको विगविगि बढेको तर्फ संकेत गर्दै स्थानिय प्रशासनको ध्यानकर्षण गराउनुभयो । घटनाबारे छानबिन गरिरहेको जिल्ला प्रहरी कार्यालय धादिङले जानकारी दिएको छ ।
