धादिङमा साउन यता ४३ जनामा डेगु संक्रमण पुष्टी भएको छ । जिल्लामा सबै भन्दा धेरै बेनिघाट रोराङ गाउँपालिकामा १९ जनामा डेंगु संक्रमण पुष्टी भएको जनस्वास्थ्य कार्यालय धादिङले जनाएको छ ।
थांक्रे गाउँपालिकामा १४, नीलकण्ठ नगरपालिकामा ६, सिद्धलेकमा २ जना, ज्वालामुखी र खनियाबासमा १÷१ जनामा डेंगुंको संक्रमण देखिएको जनस्वास्थ्य कार्यालय धादिङको तथ्याङमा उल्लेख छ । डेंगु ज्वरो अरु मौसमी ज्वरो जस्तै हो ।
डेंगी भाइरसबाट संक्रमित एडिज जातको लामखुट्टेको टोकाइबाट मानिसमा सर्दछ । उच्च ज्वरो आउनु, जोर्नी र मांशपेशीहरू बेस्सरी दुख्नु, आँखाको गेडी दुख्नु, बेस्सरी टाउको दुख्नु, शरीरमा राता बिमिराहरू आउनु, वाकवाकी लाग्नु वा वान्ता हुनु जस्ता डेंगुका लक्षणहरु हुन ।
यसबाट बच्नको लागि आफ्नो घर वरिपरि, कार्यस्थल र सार्वजनिक ठाँउहरूमा पानी जम्न नदिने, पानी राख्ने भाँडालार्ई लामखुट्टे नछिर्ने गरि राम्ररी छोपेर राख्ने, दिउँसो पनि लामखुट्टे भगाउने धूप बाल्ने र लामखुट्टेको टोकाईबाट बच्ने मलम लगाउने, घरको झ्याल ढोकामा लामखुट्टे नछिर्ने जाली हाल्ने, बिहान, दिउँसो, राती जुनसुकै बेला झुल लगाएर मात्र सुत्ने र पूरै शरिर ढाक्ने लुगा लगाउन स्वास्थ्य कार्यलय धादिङले आग्रह गरेको छ ।
