एजेन्सी । ८ साउन
विश्व खेलकुदको कुम्भमेला उपनामले चिनिने ३२ औं संस्करणको टोकियो ओलम्पिक खेलकुद प्रतियोगिता आजबाट सुरुहुँदैछ । जापानको राजधानी टोकियोमा यस वर्ष विशेष कार्यक्रमकाबीच टोकियो ओलम्पिक खेल आजदेखि औपचारिक रुपमा सुरु हुन लागेको हो । नेपाली समय अनुसार आज दिउँसो ४ बजेर ४५ मिनेटमा उद्घाटन समारोह हुनेछ । उद्धघाटन समारोहको मार्च पासमा नेपालको राष्ट्रिय झण्डा सहित नेपाली खेलाडीहरु सहभागी हुनेछन् । नेपालबाट खेलाडीसहित २३ सदस्यीय टोली टोकियो पुगिसकेको छ ।
यस संस्करणको टोकियो ओलम्पिकमा नेपालबाट चार खेलमा ५ खेलाडीले प्रतिस्पर्धा गर्दैछन् । पौडी खेलाडी गौरिका सिंह र एलेक्स शाह तथा एथ्लेटिक्सका सरस्वती चौधरीका साथै वाईल्ड कार्डबाट छानिएका सुटिङ खेलाडी कल्पना परियार र जुडोकी सोनिया भट्टले टोक्योमा प्रतिस्पर्धा गर्दैछन् । टोकियो ओलम्पिकमा पुगेकी गौरिका सिंहको यो लगातार दोस्रो ओलम्पिक सहभागिता हो । टोकियो ओलम्पिकमा यसपटक नेपालबाट जाने पाँच जना मध्ये चार महिला खेलाडी छन् । एक मात्र पुरुष प्रतिस्पर्धी छन् ।
टोकियो ओलम्पिकमा सहभागिता जनाउन २०५ देशका ११,३२४ खेलाडी सहभागी हुँदैछन् । ३३ खेलमा खेलाडीहरुले प्रतिष्पर्धा गर्नेछन् । सहभागी देशका खेलाडी, प्रशिक्षक र अफिसियलहरु जापानको राजधानी टोकियो पुगिसकेका छन् । जापान सरकारले यस प्रतियोगीताका कारण कोरोना संक्रमणको असर नदेखियोस भनेर स्वास्थ्य सुरक्षाका मापदण्डमा निकै कडाइ गरिएको छ । यसै बीच कोरोना महामारीका कारण ओलम्पिक प्रतियोगिता स्थगित गर्नुपर्ने आवाज उठिरहेका बेला प्रतियोगिता हुन लागेको हो । गत वर्ष पनि कोरोना जोखिमकै कारण प्रतियोगिता रोकिएको थियो । कोरोना संक्रमणका कारण दर्शकको उपस्थिति बिना नै प्रतियोगिता हुने अन्र्तराष्ट्रिय संचार माध्यमहरुले जनाएको छ ।
