उत्तरी धादिङको रुवी भ्याली गाउँपालिकाले प्रशासनिक सेवा अब वडा नं. ४, वृचेतमा बनेको नयाँ प्रशासनिक भवनबाट सञ्चालन गर्ने भएको छ । बुधबार बसेको गाउँ कार्यपालिकाको बैठकले मंसिर २६ गते (शुक्रबार) देखि नयाँ भवनबाट सेवा प्रारम्भ गर्ने निर्णय गरेको हो ।
कार्यालय स्थानान्तरण, सामग्री सार्ने तथा भौतिक व्यवस्थापनका कारण २२ देखि २५ गतेसम्म सेवा प्रवाहमा केही असहजता हुन सक्ने गाउँपालिकाका प्रमुख प्रशासकीय अधिकृत नविन कुमार गोलेले बताउनुभयो । गाउँपालिका अध्यक्ष रामसिंह तामाङले नयाँ प्रशासनिक भवनबाट सेवा सुरु गर्नु गाउँपालिकाको दीर्घकालीन लक्ष्य पूरा भएको बताउँदै ,“वृचेतस्थित नयाँ भवन सञ्चालनमा आएपछि जनताले थप सहज, छरितो र प्रभावकारी सेवा पाउने बताउनुभयो ।
भविष्यमा सेवाको गुणस्तर अझ उकास्ने गरी गाउँपालिका प्रतिबद्ध रहेको समेत बताउनुभयो । भौगोलिक कठिनाइका बीच सम्पन्न नयाँ कार्यालय भवन गाउँपालिकाको विकास यात्रामा महत्वपूर्ण उपलब्धि हुने उहाँको भनाई थियो ।
